Рейтинг@Mail.ru
 

Рэгіён

Гарадзенцаў запрашаюць аднавіць лес пасля летніх ветравалаў

 
Лясы пасля урагану. Ветравал

Ураганы гэтага лета запомніліся гарадзенцам затопленымі вуліцамі, пашкоджанымі дахамі і паламанымі дрэвамі ў горадзе. За межамі горада разбурэнні былі не менш значнымі. Толькі ў ваколіцах Гродна ветравалам пашкоджана каля 65 гектараў лесу. Каб нанова засадзіць гэтыя плошчы, Гродзенскі лясгас запрашае арганізацыі і жыхароў горада узяць удзел у акцыі “Адновім лес разам!”, што пачынаецца 8 кастрычніка. Работы па аднаўленню леса будуць праводзіцца на тэрыторыі Гожскага лясніцтва. 

 
 

Пашкоджаныя летнімі ўраганамі участкі леса


Пачнем увосень, скончым вясной

 

Пашкоджаныя ўраганамі часткі лясоў ужо падрыхтавалі да аднаўлення. Супрацоўнікі лясной гаспадаркі высеклі там астаткі камлёў дрэў і раскарчавалі пляцоўкі. Гэтай восенню плануюць пасадзіць новы лес на 30 гектарах. Падрыхтоўку астатніх плошчаў маюць скончыць да вясновых пасадак.

 

Да гэтага часу ідзе праца па падрыхтоўцы плошчаў, дзе прашлі ветравалы, да пасадкі новых лясных культур

 

Пасадзіць на гэтых участках новыя дрэвы варта як мага хутчэй, мяркуе галоўны ляснічы Гродзенскага лясгаса Вячаслаў Міськевіч: “Гэта паскарае вяртанне леса ў прыроду. Калі дрэвы пасадзіў чалавек, то яны пачынаюць расці практычна адразу. Калі ж пакінуць тэрыторыю ў чаканні натуральнага аблясення, то працэс можа расцягнуцца некалькі гадоў, а то і дзясяткаў”.

 

Галоўны ляснічы Гродзенскага лясгаса вячэслаў Міськевіч (Фота І. Новік)


 

Лес імя Васіля Быкава і памятны знак у гонар пісьменніка з’явіліся ў Індурскім лясніцтве

 

 

Бярозы ды сосны

 

Асноўныя масівы бураломаў у ваколіцах Гродна знаходзяцца на тэрыторыі Гожскага лясніцтва. Тут і плануецца працаваць гэтай восенню. Са словаў галоўнага ляснічага, ветравалы прайшліся ў асноўным па участках з лёгкімі глебамі. То  для аднаўлення лесу будуць высаджваць у асноўным бярозы і сосны.

 

 Выяўленне пашкоджаных участкаў лесу праводзілася аблётам


Да таго ж, змешаныя лясы, дзе разам з хвойнымі растуць лістоўныя дрэвы, больш устойлівыя біялагічна – да шкоднікаў, хваробаў і нават бураломаў. “Для кожнага ўчастка леса ужо створаны “праекты лясных культур” – каб выканаць працу згодна з нарматывамі і вырасціць лес, што будзе карысным прыродзе і дзяржаве” – распавядае Вячаслаў Міськевіч.

 

 

 

Сеянцы свае гадоўлі

 

Матэрыял для пасадак – сеянцы, вырашчаны таксама ў Гожскім лясніцтве. Мясцовы пітомнік-гадавальнік забяспечвае не толькі свае патрэбы, але і рэалізуе  маладыя дрэўцы іншым лясгасам і насельніцтву. Сёлета Гожскімі сажанцамі аднаўляюцца лясы ў Мінскай вобласці, летась была вялікая замова з Расіі, дзе імі аднаўлялі знішчаныя пажарам лясы.

 

Сеянцы неабходных лясных культур гадуюцца ва ўласным пітомніку (Фота І. Новік)

 

Каб паўдзельнічаць у акцыі “Адновім лясы разам!” трэба звязацца з Гродзенскім лясгасам па тэлефоне 41-46-13. Тут фарміруюцца спісы ды вызначаюцца месцы і час працы для кожнай брыгады. Усё неабходнае абсталяванне і пасадачны матэрыял будуць ужо гатовы, а спецыялісты лясной гаспадаркі пакажуць і раскажуць як зрабіць пасадку правільна.

 

 

Разам аднавіць, разам захоўваць

 

Калі ж паглядзець на праблему захавання лясоў вакол горада трохі больш шырока, то галоўны ляснічы адзначае “дзве галоўныя бяды“. Не меншую за ветравалы шкоду робяць тыя, хто ператварае лес у сметнік:

 

“У ваколіцах горада 275 садовых таварыстваў прымыкаюць да лесу. Кожныя выходныя сотні людзей едуць адпачыць на прыроду. На жаль, многія з іх лічаць за норму выносіць сваё смецце ў лес. Каб вычысціць і вывезці ўсё, мы трацім не менш сродкаў і высілкаў, чым на барацьбу з бураломамі”, – зазначае Вячаслаў Міськевіч. Паводле яго, у лясной гаспадаркі зараз ёсць шмат магчымасцяў для якаснага догляду лясоў. Сярод іх і новыя хімічныя прэпараты, і сучасныя тэхналогіі. Зараз важна, каб да тэхнічных магчымасцяў спецыялістаў падцягнулася і культура мясцовай супольнасці. Каб аднавіўшы лес разам, захацелася разам яго зберагчы.

 

Лясныя культуры пасля пасадкі (Фота І.Новік)


Здымкі прадастаўлены Гродзенскім лясгасам

 

Перадрук матэрыялаў сайта “Твой стыль” дазваляецца толькі з пісьмовай згоды рэдакцыі і пры захаванні аўтарства і наяўнасці актыўнай індэксаванай гіперспасылкі на арыгінал публікацыі. Падрабязнасці тут.




comments powered by HyperComments
 
 
 
 

 

 
Беларуская Асацыяцыя Журналістаў Адукацыя - стыль жыцця Беларуская Інтэрнэт-Бібліятэка камунікат.org
Гродненский Форум. Яндекс.Метрика